Shillong, Aug 30: Shillong songjinmani Bara Bazar ba Iew Duh-o dokkan dakenggipa aro songdongenggipa manderangni namgnina chate on•gipa speaker aro CCTV-rangko Mongolbar salo, KHADC-ni Chief Executive Membor Titos Chyne aro Hima Mylliem-ni membor-rang, oprake on•angaha.
Manderangna nangchongmotgipa u•iatanirangko altubate u•iatna man•na gita aro Bara Bazar-o ong•gija dakgipa kamrangko nirikkie champengna man•na gita ia speaker aro CCTV-rangko Iew Duh-o dokkan dakenggiparangna aro jolo songdongenggipa manderangna chate on•aha.
Ia speaker aro CCTV-rangko oprake on•anganio KHADC-ni CEM Titos Chyne, jinmana aganprakengon, Bara Bazar-o cha•ue ra•giparangni gimin bang•en badi ka•anirangko man•ahani gimin uamang iani bidingo ta•raken chanchirimangenba, Bara Bazar-o CCTV-rangko chatna tik ka•angaha aro ia biapo CCTV-ko chatanichi plastic jakkalanirangkoba nirikkie champengna man•gnok ine parakangaha.
Ia jolrango bang•a chadamberangan kam gri ong•e dongna nangtokengani gimin gipin biaprangoni bading chiwalgiparango pangchake dongaigija an•tangtangan bading chiwalanirangko dake an•tangtangna janggi tangani cholrangko tarichina gitaba Chyne didiangaha.
