Shillong, April 20: April 20 tariko Department ge·gittam chong·motan Garo, Khasi aro Hindi nangrime 13-gipa S.C Datta Memorial-ko maniani bak gita minggittam ku·sikrang jedake Garo, Khasi aro Hindi-rangchi aganprakaniko ong·atanio ‘Pe·skaani- ku·sik ge·sa ge·gipin baksa agangrikanio nangchongmotgipa ong·a ine katta bichongko done Shillong College-ni Conference Hall-o ong·atangaha.

Skia pora man·ani a·jao niksenggipa aro 2022 bilsio Padma Shree Uphadi-ko man·gipa NEHU Khasi Department-ni Prof. Badaplin War-ko mandera·aniko dakan baksa, skie on·gipa ong·chinaba okamjolaha.

Tom·anio aganprakengon, Prof War, pe·skaani ku·siksa ku·sikgipin baksa agangrikanio nangchongmotgipa mingsa ong·a, ian an·chingni chanchianiko, chagronggiminrangko, sason ka·ani bidingko, jatni dakbewalko ning·tue parakna man·ani chol ong·a. A·gilsak gimiko dingtang dingtang ku·sikko agangiparangko damsan ong·ate dondime chanchina man·atanide ku·sikrangko pe·skaanichisa ine Prof War aganaha.

Ku·sikrangko skie ra·ani aro uarangko pe·skaani dongosa sea jotani a·jao tang·dona man·bata. Mongsongbate Indiani salgro salaram a·dok jeon bang·a rokomni dakbewal aro ku·sik gnangchim uano pe·skaanirang nangchongmotgipa ong·a ineba Prof War agandapaha.

Prof War College-ni ge·gittam Department-ni chatro chatrirang baksaba agangrikaniko dakangaha.