Williamnagar, 3 Mar: Meghalaya Cricket Associationni Inter District Women’s Under 19 Cricket Tournament 2022 ba bilsi 19 ni ning⋅aogipa me⋅chik rangni bon·kamgipa cricket kal·susaani Rongrenggre Government Higher Secondary School kalchakram biapo Shillong Cricket Association aro South Garo Hills District Cricket Associationni gisepo susaani bilongen an·saoe matchotaha.

Toss ko amme Shillong dolrang skanggipa dokchengaha aro chugimik out ong⋅e uamang 136 ko dokaha. A·bachengo, South Garo Hills ni kal⋅aniko nirike nianio chegen ine ka·dongsojagenchimoba uamangni gisiko nange kal·anichi over 28.1 gapomangba sakdok wicketsan out ong⋅e uamang 138-ko doke chegipa ong⋅aha. Kal·anio nambatgipa boksis ba Man of the Match-ko South Garo Hills ni Jaylynn Mary R. Marak 29 run rangko man⋅e aro sak 3 wicket rangko ra⋅e cheaha. Kal·a gimiko pilak dolrangni gisepo kal·a nambatgipako seokanio gimikgimang sak 17 wicketrangko man⋅e South Garo Hills ni Smilin N. Sangma man⋅skaaha. Ian skanggipa changna South Garo Hills dol Final-ona sokaha aro chegipaba ong⋅aha ine Smilin Hub News na parakataha. Ia kal·susaaniko Meghalaya Cricket Association-ni chu·gimik dakchakaniko man⋅e ong⋅ataha ine East Garo Hills Cricket Association-ni Padot Prewin D. Sangma aganaha. Susaaniko Zone 1 aro Zone 2 dake kal·ataha. Zone 1 ni kal·aniko Nongpoh ni Nongkra kal·chakram-o aro Zone 2 ni kal·aniko Williamnagar-ni Rongrenggre School ni kal·chakramo ong·atskaaha. Ia cricket kal·susaaniko ong⋅atani miksonganide chadamberangko maidake cricket kal·anio gisiko nangate tang·doatna man·gen aro nambata gadangona ra⋅angna man·gen unan ong·a ine Meghalaya Cricket Association ni Jakrikra Gideon Karkongkar aganaha.

Indake me⋅chikrangni cricket kal·susaani skanggipa changna Williamnagaro ong·genchimoba Meghalaya Cricket Association-ni re⋅dilanio East Garo Hills Cricket Association-ni krimkro kam ka⋅anichi namen chu·sokgipa ong·aha.