Shillong, April 16: Pynursla Civil Sub-Division-ni ning·o donggipa Rngain minggipa biap jolo a·a rurudapako man·e sianggipa mande sakgnioni saksani manggisiko mija Sonibar salo man·aha ine koborna parakataha.

Ia a·sel-obosta ong·anio sianggipa sakgipin mandeni manggisikoba ra·ongkatna gita police-rang sandiataniko dakenga ine East Khasi Hills-ni Superintendent of Police, Sylvester Nongtnger koborna parakataha.

Koborko man·ani gitade, re·anggipa Sukrobar salo Shillong-oni Dawki-ona dakanggipa rama, Rngain minggipa biapo a·a rurudapako man·ani ja·man gari bolsa a·kuangchina ga·akonge a·sel ong·aha.

Ia obostako chagronggipa manderangara, Wahlyngkhat songoni Seiborlang Jaktung aro K Kongjirem ong·a ine ma·sina gita man·aha.

Unomiting obosta ong·aniko kobor man·soa tapan, a·dokni dakchakgipa skotong minister Pa Prestone Tynsong ua biapona re·ange nirokeaniko dakangaha aro ia obosta ong·anina an·tangni suk ong·gijaniko parakangenba ramako tarina jako ra·e kamko ka·gipa NHIDCL-ni official-rangna agan-ku·pattianirangko on·an baksana, jakma mingija ramako tarigiparangni kosakoba matnange aganangaha.