Shillong, Feb 14: Shillong Malkini Kharmalkini lew Dorbar Shnongko skotong minister, Ampareen Lyngdoh aro Fantin J Lakadongni dongpaanio oprake on•angaha. Skotong minister tom•anio aganengon, ia indakgipa projectrang namen an•chingna gamchatgipa ong•a aro manderangni janggi tanganirangko dingtangatna dakchakbeani ong•gen aro ian ia jolni nokking 25ni nokdangrangna namgni ong•gnok ine aganangaha.
Ia indakgipa poroject, cholko man•enggipa manderangmangmangnasan ong•aija indiba Songjinmao dongenggipa manderangna bang•en namgni aro cholrangko on•gen. Wilwilao dongenggipa ramarangko, ramasamni nalarangko rongtal-an•tale rakkianinaba dakchakani ong•gen. A•dok sorkari, songjinmani aro songadamni manderangna janggi tangani cholrangko dake on•a mikkangchi kam ka•angkugen ineba ua aganangaha.
Malki Dorbar aro samtangtango dongenggiparang, an•tangtangni biaprangko rongtale rakkina krimkro meli-nangrimna nanga. Ku•mong melie joltangko nitoatna rongtal-an•talatna nang•ni angni jakon ong•a ineba skotong minister aganangaha. Ia program ong•atgipao sak 25 manderang jean ia projectni namgniko man•paahachim uamangna chabirangkoba skotong minister, MLA, aro MDC suale on•angjolaha.
