Shillong, Sep 9: Meghalaya a•doko skanggipa changna Buckwheat Global Showcase-ko Sukrobar salo, Shillong songjinmani Mawdiangdiang, Mawkasiang-o donggipa IHM Campus-o ong•atangaha aro ia program-ko ong•atani bak gita Buckwheat cooking competition ba migom song•susaaniko ong•atangaha.

Ia migom song•susaanio Meghalaya a•dok gimikonin bang•bea manderang bakko ra•angtokaha aro ia program-ko ong•atanio a•dokni MLA aro officer-rangba dongpae bakko ra•angtokaha.

Meghalaya a•doko migom ge•aniko a•dok sorkari, 2019 bilsio dake nichengahachim aro uandaken ja 10-ni gisepon migom ge•aniko acre brioni acre 100-ona bariate game ge•e cha•giparangna bang•a namgnirangko on•na ka•dongsoengachim.

Meghalaya a•dokara mi-misirangko ge•na namgipa biap ong•ani gimin Meghalaya sorkari, a•doko migom ge•aniko da•o adita bilsirangni gisepon acre 1000-ona bariatna miksongskaengaha.