Shillong, April 23: Shillong songjinmani wilwilao COVID-19 ta•raken giproroengani gimin sorkari niamrangko ra•gate, nangchongmotgipa dokkanrangna agrede gipinrangko chipatna a•bachengtaiaha. Ia niamrangara Shillong songjinmako man•chape sepang jolo donggipa biaprangkoba man•chapgen.
Sorkarini donatgimin niam gitade, bar-rang, club-rang, cinema hall-rang, salon/beauty parlour-rang aro uandakgipa gipin dokkanrangko April 26 tarikoni April 30 tarikona chipe donangna nanggen aro ia niamrangko ja•rikchina gita sorkari official-rang salantian nirikkianggen.
Iandakgipa dokkan aro biaprangko sorkari chipatengani gimin bang•a dokkan nokgiparang suk ong•gijaniko paraktokskaaha aro dokkanrangko salsa watchange kulina on•skachina sorkariko didiangaha.
Mitam dokkan nokgiparangni parakatani gitade, re•anggipa bilsio lockdown-ko ra•gatanichi uamang bang•en noksan ong•atako man•na nangahani gimin noksan ong•giminko man•pilna gita uamang jotton ka•engachim.
“Re•anggipa bilsio lockdown-ko ra•gatanichi chinga bang•en noksan ong•na nangaha aro da•osa chinga chingni noksan ong•aniko man•pilbana a•bachengengachim,” ine dokkan nokgiparang, suk ong•gijaniko paraktokaha.
Dokkanrangko chipattaigenchimode 2020 bilsio gitan uamang noksan ong•taina nangao ga•akgnok ineba uamang, nambatgipa cholko sandie ja•kuko de•skachina sorkariko didiataha.
