Shillong, March 24: Gari-gorarangni bang·rikrikenganichi a·dokni skotong Shillong-o rama apchangket ong·enganiko namatna gita a·dok sorkarini chu·gimik tarie ba chanchie ra·baenggipa kam chong·motan, blueprint-ko tariaha ine dakchakgipa skotong minister aro Home (Police)-ko jako ra·enggipa Pa Prestone Tynsong, Sukrobar salo assembly tom·anio u·iatangaha.
Shillong songjinmao garirangni re·ruraaniko aro garirangni sket-changket ong·anirangko namdapatna gita a·dok sorkari dingtang dingtang chanchianirangko aro sandie nianirangko ra·e kamko ka·atenga ine assembly-o u·iatangenba, ramani apchangket ong·engani ja·pangko u·ina gita a·dok sorkari dingtang dingtang bewalrango ma·sie aro tale ra·anirangkoba dakataha ine Pa Tynsong parakataha.
“Iani ja·pangko ma·sie ra·anio aro dingtang dingtang department-rangni agan-ku·pattianirango pangchake Shillong songjinmao rama apchangket ong·aniko namatna gita blueprint-ko tariaha,” ine Pa Tynsong, Sukrobar salo assembly tom·ao Nongthymmai-ni AITC MLA Pa Charles Pyngrope-ni sing·anina aganchakangaha.
Iakoba poraie nina man·gen: Shillong railway project-na KHADC-ni NOC-ko man•soa dongkuja: CM
Blueprint-o janapgimin kamrangko nirokatchina gita a·dokni chief secretary-chi re·dilenggipa multi-departmental committee, chong·motan Shillong Decongestion Committee (SDC)-naba u·iataniko on·aha aro ia kamrangko nirokna gita committee, baditaba changrang tom·e chanchirimanikoba dakaha ine Pa Tynsong u·iatkuaha.
Iani bidingo, institution-rang jekai IIM Shillong, NIT Shillong aro North Eastern Space Application Centre (NESAC)-rangni agan-ku·pattianirangkoba a·dok sorkari ra·chapenga ine u·iatanga baksana, ramarangni apchangket ong·aniko namatna gita shared school bus, rakgipa niamko ra·gatani aro rama-jal·angrangko namdapatani kamrangko sorakari ka·chakatenga ineba dakchakgipa skotong minister assembly-o parakataha.
Ramarangko apalatani aro parking biaprangko taridapani giminba sorkari mongsonggipao done kamko ka·atenga aro songjinmani mongsonggipa biaprang baksa nangdime bol 30 electric bus-rangkoba a·doko a·bachengatenga, jekon a·bachenggipao minit 30-ko done bus-rangko sale niatani ja·man gadang-gadang dake minit 10 oni 15-rangona komiatrorogen ineba assembly-o u·iatangaha.
Unbaksana, ia neng·nikaniko namatna gita, Shillong Western Bypass ramako tarina aro Shillong Eastern Bypass-ko aro gipin ramarangko apalbatatna gita sorkari mikkangchina ja·kurangko de·e kamko ka·enga ine parakatan baksa, New Shillong Township-o administrative city-ko a·bachengna gita sorkari tik ka·aha aro ua biapona Civil Secretariat aro gipin sorkari office-rangko ra·jitanggen ine Pa Tynsong agandapataha.
