Shillong, Aug 16: Meghalaya a·doko, mongsongbate Shillong songjinmao niam aro ge·etanio nangchape obosta ong·enggipani bidingo ma·mongni Home Minister Pa Amit Shah baksa agangrikataha aro iani gimin una agan-talate on·angaha ine Meghalaya-ni skotong minister Pa Conrad K Sangma u·iataha.
“A·doko law and order-ni obostarangko tom·tomaona ra·bana gita chu·gimik dakchakaniko on·na gita ua (Pa Amit Shah) ku·rachakataha,” ine u·iatenba, niam aro ge·etani bidingo ong·enggipa obostarangko nirokna gita paramilitary sipai company ge·bongako watatchina ma·mong sorkario bi·ataha ineba skotong minister janapatjolaha.
Songjinmao ong·enggipa obostarangna CRPF-ni company ge·gittamko aro BSF-ni company ge·gniko watatchina mol·molataha, aro CRPF aro BSF dolgnini ge·gni company-rang da·o a·dokona sokbatokaha, ine Pa Sangma parakataha.
Indake ong·engon, da·ororo porikkarangko seenggipa aro online class-rango dongna nangenggipa chatro-chatrirangni ia tanggitik ong·a obostani a·sel mobile internet-ko dontongatna gita sorkarini tik ka·anina suk ong·nikgijaniko parakgipani bidingo, chinga poraienggipa pilakni neng·nikanirangko ma·sichakata ine Pa Sangma aganangaha.
“Internet-ko bon ka·anichi adita salrangna uamang neng·nikaniko chagronggen ine chinga ma·sichaka, indiba da·omitingde a·dokni niam aro ge·etani obostarangan namen dal·bata.
Beben, ia somomitngo poraienggiparangni gisepo adita neng·nikanirang aro suk ong·gijanirangde dongaigen jekon gelna man·jawa, indiba a·dokni law and order-ni mamlako niate, a·doko tom·tomaniko ra·baani giminsa sorkari pangnan skang done kamko ka·rongenga,” ine skotong minister agandapataha.
