Shillong, Feb 2: Meghalaya sorkarini mingnamgipa project-rangoni mingsa ‘Shillong Technology Park’-ko Budbar salo, Meghalaya a•dokni Chief Minister nokdonggae on•angaha aro ia tom•anio a•dokni Information Technology & Communication Minister Hamletson Dohling aro PHE Minister Renikton Lyngdoh-ba dongpae bak ra•angaha.
Shillong Technology Park-ko nokdonggae on•angani somoio Meghalaya Chief Minister, jinmana aganprakangengon, ia Shillong Technology Park-ba ia 2022 bilsini gisepo Meghalaya a•dokni bilsi 50 gapaniko maniani bak gita a•bachengate on•na sienggipa ming 300 project-rangoni mingsa ong•a ine parakangaha.
Ia Technology Park-ko kulianichi a•gilsakni dingtang dingtang biaprango donge kam ka•enggipa Meghalaya a•dokni IT professional-rangna, a•doktangna on•gilpana gita namgipa cholrangko on•gnok ineba Chief Minister parakataha.
Ia Technology Park-ko kulianichi kamrangko ka•e cha•na cholrangko ong•katatani gimin janapangengon, ia Technology Park-o sak 1500-na baten manderang kamrangko ka•e cha•na cholrangko man•genchimoba ia Park-ko kulianichi changgittam baten manderangna janggi tangani cholrangko on•na man•gen ine Chief Minister aganaha.
“Uni gimin ia Technology Park-ara mingsachisan ong•aigija dingtang dingtang dake janggi tangani cholrangko chadamberangna on•na man•gen,” ine ua aganaha.
Shillong songjinmao 5 star hotel-rangko kulina siengaha aro ian Information Technology-chi chalaienggipa dingtang dingtang kamrango ecosystem-ni gitaba cholrangko on•gnok ineba Chief Minister parakataha.
Bangladesh a•songo donggipa Chittagong port-oni Shillong Technology Park-ona submarine cable-ko ra•bana man•na gita uni sorkari, India sorkari aro Bangladesh sorkari baksa agangrikenga ineba ia tom•anio Chief Minister parakataha.
Ia Shillong Technology Park-ko 2019 bilsio a•bachengate ja 25-ni gisepon matchotatahachim.
