Shillong, April 27: Amlarem civil subdivisioni ning•o donggipa adita songrangrangni game-ge•e cha•giparangko namdapatna aro tang•dororoaniko on•a Home minister Lakhmen Rymbui Shkenpyesit songo Collective Marketing Centreko oprakangaha. Iako rikanina tangka gong lak 7 mangni ong•achim, jekon Integrated Village Co-operative societyni gita Meghalaya Livelihood Access To Marketing Programni ning•o rike on•aha.

“Meghalaya a•doko game-ge•e cha•giparang 70% ni gita donga. Da•oni sorkari game-ge•e cha•giparangko mikpakma nie dakchakaniko on•a jotton ka•enga” in•e tom•anio Rymbui aganaha. Iana agreba Meghalaya sorkari, Piggery mission, jackfruit mission, FOCUS program aro indakgiparangko a•bachengate on•manaha aro ian a•dokni manderangna namgipa biterangko on•enga ineba minister talatangaha. Ia tom•anio Amlaremni BDO Dr. D Lyngdoh rimchaksoani kattarangko aganaha. Subduvisional agricultural officer C Naziar, West Jaintia Hillsni ADC D Syngai aro gipinrangba bak ra•angpaaha.

Ia tom•anio dol 81 producer grouprangna FOCUS ni ning•o tangka gong lak 6koba suale on•angjolaha.