Shillong, May 19: Sibreng ba epilepsy sagipako namatna man•ani bidingo manderangna u•iatna sal 6 ni campko Shillongo ong•atangaha. Chennai-oni MIOT International aro Shillongni Bethany Society dol nangrime ia consultation programko ong•atangaha.
Chennai-oni epilepsy disorder specialist aro epilepsy surgeon Dr. Shankar Balakrishnan aro Dr. Hrishikesh Sarkar Bethany Hospital Shillongo ong•atgipa press conferenceo iani gimin agan-talataha. Neurological diseases ba taningni ja•dil aro bakrangni a•sel ong•gipa sabisirang jekai stroke, alzheimer, sibreng, sko-o saknaa man•ani brain tumor indakgiparangara ramram sabisirangan ong•aia ine Director of Department of Neurosurgery MIOT International Dr. Hrishikesh Sarkar aganaha.
Uamangni ia biapona re•baani miksonganian indakgipa sagiparangko sana namgipa ku•pattianiko on•a ong•a.
Epilepsy saaniko namatna man•aia aro iako sana-banaiko dakna namen koros ong•na nanga. Unigimin MIOT aro Bethany hospital iako name jako ra•e ka•china sorkariko didianggen ineba janapaha.
