Nongpoh, Dec 28: Ri-Bhoi a·jani ning·ogipa Byrnihat-o skanggipa changna silchidare aro gullirangko palchakgipa dokan nokko Jirang constituency-ni MLA Sosthenes Sohtun-ni jakchi Mongolbar salo oprake on·angaha.

Ia silchidare aro gullirangko palna Meghalaya sorkarioniko niam gita license-ko man·ani ja·man, M/s East India Arms ine bimingko done kulligipa dokan nokko oprake on·angani somoio, Jirang constituency-ni MDC, Victor Ranee, Dilip Kharkrang aro gipin niksenggipa manderang gimikan bak ra·angtokpaaha.

Iako oprake on·anganio jinmana aganprakatengon, sorkarioniko niam gita license-ko man·gipa manderangna agrede silchidare aro gullirangko ramramani manderangna paljawa aro darangba skatang brena gita man·jawa ine Dilip Kharkrang parakataha.

Ia gital kulligipa dokano palenggipa goani silchidarerangara, kolgni donggipa silchidare, pistol aro gullirang ong·a. Indake ong·genchimoba, sorkarini jakkalenggipa manderang, armed police aro army-ni jakkalgipa slairangkode ua dokano pal·skajawa. Unbaksana, ua silchidarerangko Ri-Bhoi a·jao songdonggipa manderangna agrede gipin district-ni manderangna aro license donggijagipa manderangnade paljawa.