Shillong, Nov 30: Ru·uta bilsirangoni a·dok damgnini gisepo simana kajia-golmal ong·baenggipa biaprangni bidingo da·o Assam aro Meghalaya a·dok damgni sorkarirang namatna kamrangko ka·atengon, Khasi Students’ Union – North Khasi Hills Unit (KSU-NKH), on·sregrikani ba on·a-ra·a dakgipa policy-ko jegalenba, jerangan Meghalaya-nichim uko a·dokni map-o chapatna nanga ine aganangaha.
Iani bidingo Mongolbar salo kobor ra·timgiparangna aganangengon, KSU-NKH-ni seoke watata man·gipa Received Pator, Nongspung-Sohiong Syiemship-ni ning·o donggipa sima jolrangona a·dok damgnini sokarirangni re·bae nirokeani somoio manderangko chane vote man·gipachi dolgni sorkarini iandakgipa policy-ko dakaniko KSU chu·ongnikja ine aganata baksana, uamangna vote-rangko on·china didie Assam sorkari songrangni dilgiparangna tangka-paisarangko on·e aro bilrangko mesoke kamko ka·enga ineba ua matnangataha.
“Dolgni sorkarirangni tom·na antisa skangsan ua songrangni dilgiparang baksa agan-golpogrikna Assam sorkari uamangni officialrangko watataha.….indake Assam sorkarina vote on·china gita songni dilgiparangna tangka-paisakoba du·engarok, sawa ma·sia,” ine Pator, matnangatan baksa, Nongspung-Sohiong Syiemship-ni ning·ogipa Patkang songni manderangko kenatna Assam sorkari, ua biapo CRPF sipairangkoba donataha ineba ua aganangkuaha.
Pator-ni matnange aganangkuani gitade, golmal gnanggipa sima-arini gimin da·o kam ka·atenganiko namedake rakkina aro maming namroro-silroroatani kamko ka·kujana gita a·dok damgnini gisepo songgigrikaniko dakgimin biaprango Assam sorkari da·omangba namroro-silroroatani kamrangko ka·atengkua. Uni gimin chinga ia on·sregrikani policy-ko maming dakeba ra·chakna man·jawa indiba jerangan chingnichim uade pangnan chingnin ong·kamaigen,” ineba ua agandapataha.
