Shillong, Feb 2: Meghalaya a•doko matchote guare kakujani a•selo matchu badingsrikanirang batroroenga. Bangladesh aro Indiani sima ariosan ong•aigija state border-rangmangba tik ong•kujaenga. Beben state borderni gisepo meligrikgijanirang donggenchimoba adita songrangkode namatna man•aha. Indo-Bangla sima-ni guare-rangko 75% mangni gitade kana man•aha indioba bangkirangkode sima-ario neng•nikanirang dongkuengani gimin kana man•kujaenga.
Badiaba biaprangode sima-ario songdogipa krongrangna agrede mamingan dongja. Sima-ni krongrangchisa a•song damgnini dingtanggrik ong•aniko mesokeengpiti. Badiaba jolrangode na•a an•tangkon Bangladeshni a•aonma Indiani a•aon chadengengama u•ina jajaani ong•pilnaba donga. Iandakgipa biaprang gitan Bangladesh-ona Indiaoni sriksrik matchu badinggiparangna chol oe on•skaa gita ong•skaenga. Dawkini gital anti cha•ram Lingkhat gitade guare dongjani a•sel matchu badingsrikgiparang altuaen ra•angna man•aenga. Indioba BSFrang miktuatgija nirokani a•selo uamangkoba bang•en rim•na man•skaenga. Guare kaanio neng•nikbatsranggipade Indiani songrango ong•batenga, maina guare kajokode bang•bata songrangan Bangladeshni ning•aosa ga•akaignok. Ian Indiani bang•a songrangna kensoani aro jajrengna nangani ong•enga. Uni gimin Assam-Meghalaya simarangni neng•nikanirangna bate India-Bangladesh sima-arina neng•nikanirang namjabatgen. Unigimin ia a•song gipini sima-ario tik ong•gijanirangko seng•gnangkale namgrikatanina kam ka•chengna nangenga.
