Shillong, Apr 24: Assam aro Meghalaya a·dokni simani bidingo Meghalaya a·dokni Chief Minister Conrad K Sangma, manderangko togie a·doktangni manderangkon chonnika gita ong·enga ine Sonibar salo, Opposition dolni dilgipa Mukul Sangma matnangataha.
“Ua (Conrad) togina jotton ka·anichi a·doktangni manderangkon chonnikenga. Ian Dr Mukul-ko chonnika ong·jaenga indiba a·dokni manderangkosa chonnika ong·enga,” ine Mukul aganaha.
Assam baksa MoU-o soi ka·grikani gitade, Meghalaya sorkari, Khanapara, Ganesguri aro Maikhuli-ko Assam-na on·ataha ineba Mukul parakataha.
So·sojengjeng ong·enggipa biaprangko man·pilna aro Meghalaya a·dokon donchina gitasa 2011 bilsio Assam sorkarina lekkarangko on·ahachim ine talataniko on·angengon, Assam aro Meghalaya sorkarirang ‘on·sregrikna’ ine agana indiba sani a·arangko uamang on·na am·enga ine Mukul sing·doangaha.
“Uamang da·o so·sojengjeng ong·enggipa biaprangna agreba gipinrangkoba namatna kam ka·aha ine chief minister aganenga indide ua obostani giminan name ma·sijaenga. Ia obostani ning·o mai dakgipa neng·nikanirang dongachim, ua iakon name ma·sijaenga. Iani giminsa angni gisiko kenchakani ong·katahachim aro Assembly-oba angani iani giminan baditaba chang an·tangni kenchakaniko parakahachim indiba uamang angna ka·dingstekjachimma?” ine Mukul aganaha.
Mukul-ni parakatani gitade, 2011 bilsio ia meligrikna man·jaenggipa biaprangni bidingo a·kanganirangko dake lekkarangko on·atani ja·man Assam sorkari, changsaba iani bidingo agangrikna gita re·mikkangbajahachim.
“Angni chanchiani gitade, iani bidingo uamang Dr Mukul Sangma baksa agangrikna nanggenchimode ia a·arangko Assam-na pakwate on·jawa ine uamang ma·siachim. Ia a·arangko anga Assam-na pakwate on·jawa aro iako uamang namen ma·siani giminsa Conrad Sangma-ni somoion ia kamko matchote ra·rikna man·aha,” ine Mukul matnangataha.
Ia biaprangko Assam sorkari ta·raken man·rikna skani giminsa changni chang Conrad Sangma baksa tom·anirangko ong·ataha aro December, January jani somoirango chuttini salrangoba uamang tom·anirangko ong·ataha ineba Mukul aganaha.
Malchapara, Malang Salbari, Malangkona songrangara Meghalaya a·dokni ning·o ga·akgipa songrangan ong·achim ine talatangengon, ia songrangode maming meligrikgijani aro so·sojengjeng ong·anirangba dongpajachim ine Sangma parakataha.
Maikhuli songko bak ka·e on·ahani giminba ua Chief Minister-ko sing·doataha.
“Ia a·selrangni giminsa ua changni chang Meghalaya sorkariko, MoU-o soi ka·kujachina aganahachim,” ine ua aganaha.
