Tura, Apr 4: Sombar salo, Meghalaya a•dokni Chief Minister Conrad K Sangma, Tura-o Skill Park aro Youth Centre baksana Track aro Field Stadium-na pangchakaniko songe on•angaha.
Skill Park aro Youth Centre-ko rikna gita gong kror 24 tangkarangko chamengon, Track aro Field Stadium-ko rikna gita gong kror 16 tangkarangko chame donskaaha.
Iarang minggnian kal•susaani aro jatni daka rikanio chadamberangko namdapatna miksonge sorkarini kulie on•na sienggipa cholrang ong•enga.
Ia project-rangna pangchakaniko songe on•angani somoio a•dokni Chief Minister, jinmana aganprakangengon, Meghalaya a•doko dal•dalgipa nokrangko rikna sorkari rake kamko ka•enga aro Tura jillara Garo Hills-o mongsongbatgipa biap ong•ani gimin sorkari, jillako nitodapatani project, smart town project, Tura jillani ning•o donggipa ramarangko taridapani, PA Sangma Integrated Sports Complex aro uandakgipa dingtang dingtang project-rangko man•chape dingtang dingtang kamrangko kakketo chu•sokatna jotton ka•enga ine parakangaha.
Batanggimin bilsirango Tura jillani ramarangko taridape on•anirang dongjahachim ine janapatengon, Tura jillao songdongenggipa manderangni namgnina ia sorkari, Tura jillani ramarangko tarie on•na a•bachengaha ine Sangma parakataha.
Chief Minister-ni parakatani gitade, ru•uta bilsirangna Tura jillako galchipe donahaoba da•o dingtang dingtang project-rangko a•bachengatanichi Tura jillako namdapatna man•engaha.
Batanggimin bilsignini gisepo Covid-19 sajinmani a•sel dingtang dingtang neng•nikanirangko chagrongna nangahaoba ia sorkari ka•donganiko watgalgija kamrangko ka•aha aro namroro silroroaniko ra•bana man•aha ineba Sangma aganaha.
PA Sangma Integrated Sports Complex-o gital chasongni robol kal•chakgipa biap donggen aro ian salgro salaram a•dokrango nambatsranggipa football stadium-rangoni damsa ong•gen ineba Chief Minister parakataha. Ia kror 128 ong•gipa project-ko matchotahaode Indian Super League (ISL) gita dakgipa a•songni kal•susaanirangko sokachakna man•gnok aro ia stadium-ko da•o June-July jaranni gisepode matchotgnok ineba Sangma aganaha.
Ia program-ko ong•atanio Chief Minister-ni jakchi, Tura jillani ning•o donggipa dingtang dingtang skulni chatro chatrirangna M-Tab-rangko suale on•angaha aro FOCUS program-ni ning•o dol 50 producer group-rangnaba gimik gong lak 28-ni cheque-rangko suale on•angjolaha.
