Williamnagar, April 5: April 5 tarik-o Meghalaya a•dokni skotong minister Pa Conrad K. Sangma, Williamnagar ni MLA aro Sorkarini Chief Whip Pa Marcuise N. Marak, East Garo Hills a•jani Deputy Commissioner Pa Swapni Tembe, East Garo Hills ni SP Pa Bruno A.
Sangma, NPP dolni a•gipi dilgiparang, sorkarini ning•o chugipa gadang-o kamka ka•giparang aro Samanda Block ni ning•o donggipa songni-nokni manderangni mikkang-o Chisobibra Suspension Bridge ko oprake on•angaha.
Tom•anio Samanda C&RD Block ni BDO Pa Albert G. Momin rimchaksoani kattarangko agane, ia suspension bridge ko maidake a•bachengahachim uko talatange, song chetni manderangko uamangni ku•monge aro chanchininge kam ka•anichi ia chu•sokna man•aha ine songni manderangko mitele, sorkarini dakchakaninaba mitelangjolaha.
“Ia dolongko man•anichi chingna bilongen dakchakbeaniko on•gnok maina batanggimin salrango iano dolong dongjani a•sel songni-nokni manderang bang•en nengnikanirangko chagrongna nangaha” in•e songni mande saksaba aganpae Meghalaya sorkariko aro Samanda C&RD Block ni BDO aro staff rangko mittelpilangaha.
East Garo Hills ni Deputy Commissioner Pa Swapnil Tembe, ia indakgipa kamrangko ka•na sorkarini dakchakanina a•dokni skotong minister ko mitele, Williamnagar ni MLA-ko pilak namgipa kamrang-o uni dakchakanirangko on•anina mitelangaha. Un baksa Samanda C&RD Block ni BDO aro uni dolko gisiko nange kam ka•enganina mitelpilangaha.
Tom•anio Williamnagar ni MLA Pa Marcuise N. Marak, ru•uta bilsarangna dolong dongjani a•sel nengnikaniko manenggipa da•o chusokna man•ahanina, ian ia jolni manderangna katchaani sal ong•a ine agane, a•dokni namroro-silroroanina name dakdilenganina aro re•dilenganina sorkariko aro skotong minister ko mitele aganangaha.
Mongsonggipa sokgipa ong•e skotong minister aganengon, ua song damchet ni manderangko uamangni bilsi 30 batpile nengnikaniko man•enggipako gimaatna jilma ku•cholsan kam ka•anina mittelange, ian Meghalaya-o donggipa manderangna namgipa dakmesokani ong•gnok ine aganaha.
Skotong Minister Jal Jeevan Mission ni ning•o, bang•a songrangna pipe aro tank-rangko sorkari rike on•enga, indiba mitamode chiko chu•ongagita man•jaenga aro iani giminan bang•a complainrang soktokenga. Indiba Skotong Minister ba, MLA ba aro engineer-rangba chikode tarina manja. Uni gimin sakantian chiko tangate rakina, bol-waa rangko ripingna kam ka•na nanga ine jilmako mol•molange, sorkari ianaba kamrangko ka•na abachengengaha ineba jilmana parakaha.
Tom•a matchotani ja•man songni me•chikma saksako sing•on, ia dolong-ko man•anichi uamangna bilongen dakchakani ong•gnok ine uaba kusi ong•bee parakaha.
