Shillong, Aug 2: Meghalaya a•dokni dingtang dingtang skulrango skigiparang chu•ongjaengani a•sel chatro chatrirang neng•nikanirangko chagrongna nangtokengani gimin Umroi-ni MLA George Lyngdoh aro Nongpoh-ni MLA Mayralborn Syiem, suk ong•gijaniko parakattokaha.

Skulrango skigiparang chu•ongjaengani gimin suk ong•gijaniko parakatengon, skigiparang chu•ongjaengani giminsa uamang, contract-na skienggiparangko sorkarini ra•gale galaniko jegalahachim ine AITC-ni MLA George Lyngdoh parakataha.

Contract-na skigiparangko ra•galani a•sel bang•bata skigiparangan kamgri ong•e dongna nangtokengaha ine janapatengon, skigiparangko gadangni krisa kamoniko ra•galna nangachim ine Lyngdoh parakataha.

Bang•a skulrangon skigipani kamrang bangbang ong•e dongengachim indiba ia bangbang ong•e dongenggipa kamrangko sorkari gapatna man•kujaenga ineba ua parakataha.

Indake ong•engon, dingtang dingtang gadango skigiparang, sorkarini kamrango suk ong•tokjaenga ine Congress doloniko ra•gala man•gipa Nongpoh-ni MLA Mayralborn Syiem-ba parakatenba, skigiparangni neng•nikanirangko aro nangnikanirangko sorkari chu•sokate on•na nangenga ine janapataha.

Je skulrangon skigiparang chu•ongjaengachim, uandakgipa skulrango nangani kri skigiparangko rakkichina gitaba ua sorkariko didiataha.