Shillong, Dec 4: A·dokoni pilak game-ge·e cha·giparangna namgni ong·gipa sorkarini ra·gatgimin dingtang dingtang programrangchi dakchakaniko man·gnigipa manderangna Community & Rural Development-ni Minster, Pa Hamletson Dohling aro gipinrangni dongpaanio, a·dokni skotong minister Pa Conrad K Sangma, mija Sonibar salo Mylliem, Laimer songi Umlyngka Ground-o programko ong·atanggipao cheque-rangko suale on·angaha.
Mylliem-o dal·bee tom·aniko ong·atgipao game-ge·e cha·giparangna dakchakaniko on·enggipa dingtang dingtang sorkarini programrangko a·bachengate on·na gita man·anina an·tangni kusi ong·aniko parakangengon, a·dokni skotong minister, a·song gimikoni nambatgipa dam 10 a·dokrang baksa Meghalaya a·dokkoba chapatna gita aro a·doko songdongenggipa gimikni namgnina sorkarini on·kange aroba pilakna skanggipao done kam ka·atenganirangko ia program-rangchin mesokenga ine janapatan baksa, a·dokoni lak 4.5 mangni gitade game-ge·e cha·enggipa nokdangrang ong·ani gimin, uamangni gama-ge·anirango dakchakaniko on·na, gama-ge·aniko apalatna aro pangkamatna gita FOCUS aro FOCUS+ program-rangko a·dok sorkari a·bachengate on·aha ine skotong minister parakataha.
Game-ge·e cha·giparangna on·enggipa programrangni gita sorkari, bilsirikitan tangka-paisachi dakchakaniko on·na miksongani gnang ine u·iatangengon, songadamrango manderangni janggi tangani gadangrangko tang·doatna gita bilsiantin gong kror 400 tangka-paisarangko on·e sorkari dakchakaniko on·gen aro ia tangka-paisarangko namana aro biterangko ong·katatna gita jakkalchina skotong minister manderangko mol·molangaha.
Chadamberangni janggi tanganiko tang·doatna dakchakaniko on·enggipa YESS Meghalaya programni bidingo skotong minister u·iatangskaengon, “a·dokoni pilak chadamberangni changa-sapanirangko aro bil gnanganirangko namgipa miksonganiona ra·bana gita nanga aro kal·susaani aro doka-damanina uamangni gisiko nanganirango dakchakanirangko on·e uamangna namgipa janggi tangani cholrangko on·na nanga, ineba skotong minister agandapataha.
PESS program-ni mongsonggipa bakrangni gimin janapatskaengon, skotong minister, Meghalaya a·dokni buring-bolgrimrangko aro uarango donggipa pilak janggi gnanggiparangko ripinganio ka·mabatgipa gadangoni dakchakaniko on·e tang·doataniko ra·bana miksongani ong·a ine u·iatanga baksana, a·doko gnanggipa 90 percent mangni gita buring-bolgrimrangan songni ba gittimrangnisa ong·ani gimin ua pilakko ripingna aro chelchakna gita sorkari, tangka-paisako on·e dakchakaniko on·skaenga ineba Pa Sangma parakataha.
Do·o aro Wak jille cha·anirangchi manderang an·tangtangna janggi tangani cholko dake ra·china aro uandakgiparango dakchakaniko on·na gita sorkarini a·bachengatgipa PROGRESS program-ni giminba skotong minister, programo bakko ra·gipa manderangna u·iatangjolaha.
Bon·chotao, a·dokni skotong minister, Mylliem jolni pilak game-ge·e cha·enggiparangna aro sorkarini progamrangoniko namgniko ra·enggiparangna cheque-rang, sanction letter-rang aro FOCUS+ -ni Identity Card-rangkoba manderangna suale on·angaha.
In the midst of thousands of people from far and wide of Mylliem Constituency & together with Hon’ble Minister & MLA of the constituency, Sh. @HamDohling, financial benefits under FOCUS+ were handed over to 458 producers amounting to 22.90 Lakhs. @nstomar @AgriGoI pic.twitter.com/jR9VklQ9ya
— Conrad Sangma (@SangmaConrad) December 3, 2022
