Shillong, Dec 15: Meghalaya a•doko self help group (SHG)-rangko aro game ge•e cha•giparangko tang•doatna gita program-rangko ra•gate on•anichi a•dok sorkari, songadam nokadamrango manderangni janggi tangani gadangko dingtangatna kam ka•enga ine Budbar salo, Meghalaya a•dokni Chief Minister Conrad K Sangma parakataha.
Budbar salo, East Khasi Hills a•jani Mawkynrew Block-ni ning•o donggipa Rapleng songo, a•dokni Agriculture Minister Banteidor Lyngdoh baksa SHG Mela-ko ong•atanio bak ra•angengon, ia sorkari SHG-rangni gamchatgipa ong•aniko ma•sichakgipa ong•ani gimin batanggimin bilsi gittamni gisepon, National Rural Livelihood Mission (NRLM)-chi hajalni hajal SHG-rangna tangka paisarangko on•e dakchakna man•aha ine Chief Minister parakangaha.
NRLM-o kam ka•enggipa mande sakantian a•doko songdongenggipa manderangna dangdike on•na gita rakbee kamrangko ka•enga ineba ua aganaha.
Ia SHG Mela-ko ong•atanio a•dokni Chief Minister aro Agriculture Minister, Mawkynrew Block-ni ning•o donggipa dingtang dingtang songrangna, uamangni dingtang dingtang kamrango chu•sokgipa ong•anina mittelpilani certificate-rangkoba on•angjolaha.
A•dok sorkarini ra•gatgipa Farmers Collectivisation for Upscaling and Marketing System (FOCUS)-ni ning•o bikotgipa dol 70 Farmers Producers Group-rangnaba ia tom•anio a•dokni Chief Minister aro gipin dilgiparangni jakchi cheque-rangko suale on•angjolaha.
Meghalaya a•doko songdong a•chaenggiparangoni bang•batan game ge•e cha•giparangsa ong•ani gimin sorkari, dingtangmancha FOCUS-ko ra•gatenba game ge•e cha•enggiparangna tangka paisarangchi dakchake on•na man•aha ineba ia tom•anio Chief Minister parakataha.
A•doko namroro silroroaniko ra•bana gita kam ka•anio sorkari, batanggimin bilsi gittamni gisepo rama jal•langrangko nambatatna gita bang•bea tangka paisarangko chame on•aha ineba Sangma aganaha.
Songadam nokadamrango donggipa block-rang nambate kamrangko ka•na man•na gita a•doko donggipa dam 46 C&RD block-rangko sorkari namdapatgen ineba Chief Minister parakataha.
Chief Minister-ni aganani gitade, a•dokni block ge•antinan sorkari, gong kror 3 ka•e tangka paisarangko chamanaha aro block-rangko namdapatna gita mikkang bilsionin dingtang dingtang nokrangko rikna a•bachenggnok.
Ia Mela-ko ong•atanio a•dokni Chief Minister, dol 70 Farmer Producers Group-rangna gimik gong lak 48.55-ni cheque-rangko, dol 8 Village Organisation-rangna gong lak 22.80-ni Community Investments Fund-rangko aro dol 19 self help group-rangnaba gong lak 27-ni bank loan-rangko on•angjolaha.
Ia apsan salon ua, MGNREGS, NRLM aro MBMA-ni nangrime ra•gatgipa Marlet Outlet project-koba Mawkynrew C&RD Block-ni ning•o donggipa Laitdiengsai songo a•bachengate on•angjolaha.
