Shillong, Feb 8: Sorkarini nangnikani gitan tom•tomaona re•bapilna agangrikna maming niamrangko donjawa ine Mongolbar salo Hynniewtrep National Liberation Council (HNLC) parakatenba, iani bidingo ta•raken ku•baltitimgipako seokskachina sorkario dabiangaha.
“Da•o chinga Indian Constitution-ni niam gitan agangrikna tariaha aro sorkari baksa agangrikna chinga maming niamrangko donjawaha. Indiba iano Standstill Agreement (SA) aro Instrument of Accession (IOA)-kode man•chapskajawa ine chinga jinmana u•iatenga. Da•o India sorkari nangnikenga ong•ode chinga agangrikna tariaha,” ine Mongolbar salo, HNLC-ni general secretary aro publicity secretary Sainkupar Nongtraw seachi parakataha.
Batanggimin salrango ja•delgimin manderang aro dingtang dingtang dolrang mol•molahani gimin uamang tom•tomaona re•bapilna gita ia ja•kuko de•na tariaha ineba Nongtraw parakataha.
HNLC-ni gitcham general secretary Cheristerfield Thangkhiew-ko police-rangni so•ote galani giminba ua suk ong•gijaniko parakataha.
Dolgni agangrikna gita ta•raken ku•baltitimgipako seokchina sorkariko didiangengon, indita bilsirangna an•chi parirangko nikgrikani ja•man da•o HNLC bobil dol sorkari baksa agangrikna tariaha aro tom•tomaniko ra•baanide da•o sorkarini jakonjok ine HNLC-ni general secretary parakataha.
