Tura, March 22: GHADC-o kam ka·enggipa Non-Gazetted Employees Association (NGEA), re·anggipa February 16 tariko tom·ani ja·man 18 tariko jinma re·jome, February 19 tarikoni kamtangtangko ka·gija GHADC office-ona napram cholgugao jinma asonge jingjengataniko dakanga baksana salgittamna okgimu chake jingjengatani ja·man ia March jani 19 tariko Shillong songjinmaona re·ange jinma asonge jingjengatahaoba a·dok sorkarini da·alona kingking maming aganchakaniko on·kujaengani gimin Sombar salo tom·taienba chanchirimaniko dake jena kingking a·dok sorkari uamangni dabiako knachakja apsandake uamangba kamtangtangko ka·gija jingjengatangkugen ine NGEA-ni jakrikra Pa Brithen Sangma koborna parakataha.
“Chinga jasa batpile dingtang dingtang ja·kurangko de·e chingni man·gnigipa dormaharangko on·china dabie jingjengatahaoba chingni inditan kosto ong·anirangko uamang ma·sichakja aro a·dok sorkari iako namrengesa ra·aiaha. Jensalo Assembly eleksin sokbagen, unosa chingni gamchatako ma·sigen. Chingni GHADC-o kam ka·chengaoni pangnaba indakgipa obostako chinga chagrongkujachim, indiba Executice Committee (EC) aro a·dok sorkarini GHADC-o kam ka·enggiparangna chu·gimik ja 31-rangni dormaharangko on·na man·gijanio ian skanggipa chang ong·e GHADC-o gital ma·ambiko segatchengaha,” ine NGEA dilgiparang an·tangtangni suk ong·gijanirangko parakataha.
“Chingni kamtangtangko ka·gija jingjengatenganio, officer-ni gadango ong·gipa kam ka·giparangkode mamingchiba champengja uamang kam ka·ani salrango office-ona re·bae kamtangtangko ka·ena man·aigen, indiba chinga Non-Gazetted Employee (NGE)ni gadango ong·giparangsa kamtangtangko ka·gija dontongangkugen,” ineba NGEA-ni dilgiparang agan-janapatkuaha.
