Shillong, Jan 17: Sorkarini kamrangna dongimin upper age limit ba batgipa bilsiko 32+5 dakatchina dabitokengon, iani bidingo Meghalaya Cabinet da•o changgipin tom•anio chanchiangtaina gita tik ka•e donangaha.
Da•o dipet Meghalaya a•doko sorkarini kamrangna dongimin bilsi 32-onasan ong•kuengani a•sel bang•bata chadamberangan cholrangko gimaatna nangtokenga ine ia dongimin bilsiko komibeoba 37-ona bariatchina gita dingtang dingtang dolrang dabitokengachim ine nikna man•a.
Indake ong•engon, Sombar salo a•dokni Cabinet, iani bidingo chanchirimangenba, ia dabianiko nambate chanchina nangkuenga ine da•o changgipin Cabinet tom•anio chanchiangskana gita tik ka•e donangaha.
Cabinet tom•a matchotani ja•mano kobor ra•timgipa manderang baksa agangrikengon, da•alni tom•anio Cabinet, gipin kamrangni giminba chanchiangaha ine a•dokni Home Minister Lahkmen Rymbui parakataha.
Bi•sarangna chononin namdapataniko ra•baani gimin chanchirimangengon, iani bidingo a•dokni Cabinet, dingtangmancha Early Childhood Development Mission-ko ra•chakangaha aro ia mission-ko Social Welfare, Health aro Education department-rang nangrime jako ra•anggen ine Rymbui parakataha.
Meghalaya a•doko dam 1500 songrangna baten Integrated Child Development Services (ICDS) program-ni ning•o ga•akgipa songrang ong•jani gimin ia mission-ko ra•gatanichi bi•sarangna an•seng baljokani aro lekka porako nambate on•na man•gnok ineba Rymbui parakataha.
Indake ong•engon, Cabinet-ni tom•anio Meghalaya Settlement of Arrears (Under the State Taxation Acts) Ordinance 2022-ko taridapna bi•anikoba sorkari ra•chakangaha ine Home Minister parakataha.
Iana agreba, non-transport vehicles ba scooty, moped gita dakgipa garirangna 2021 bilsini August 28 tariko India a•songo a•bachengatgipa Bharat Series ba BH Series nombor plate-rangko ra•gatna Transport department-ni proposal ra•baanikoba Sombar salo sorkari ra•chakangaha ine Rymbui parakataha.
Niam gitade, BH Series nombor plate donggipa garirangni nokgiparang, gipin a•dokona re•jitangna nanggenchimoba gital dake gariko register ka•taina nangjahachim.
