Shillong, Apr 22: Meghalaya a•dokni Adhoc skulrango skigiparangna gong 18,000-chi dormahako bariatchina aro bilsio 5 percent ka•e bariatchina dabianiko sorkari, on•na gita ku•rachakaniko on•jaengani gimin Sukrobar sal dipet Federation of All School Teachers of Meghalaya (FASTOM), sorkarini kosako jingjengatanirangko dakna a•bachengataha.
FASTOM-ni executive membor Mayborn Lyngdoh-ni kobor ra•timgiparangna parakatani gitade, Sukrobar salo uamang, Education department-ni official-rang baksa Additional Secretariat-o tom•e chanchirimahachim indiba ia tom•anio sorkari official-rang, skigiparangni dormaharangko bariatna gita maming ku•rachakaniko on•jahani gimin skigiparang, jingjengatangkuna tik ka•e donangaha.
“Ia tom•anio chinga sorkarioni maming ku•rachakaniko man•jaha indiba chingni dabienggipani bidingo Directorate-ni tarigimin file-ko watatani giminsan janapaiaha. Ia file, planning department aro finance department-ona ja•manosa sokanggen aro iako dakanio komibeoba jadok somoirangko nangkugen. Ia pilakan sorkarini somoi ra•chae dongna miksonganiko mesokanisan ong•enga aro chinga indita somoiko sorkarina on•chae dongna man•jawa,” ine Lyngdoh aganaha.
FASTOM-ni parakatani gitade, adhoc skigiparangko deficit-ni gadangona ra•doatanio gong kror 250-mangkosan nangdapaigenchim indiba sorkari, adhoc skigiparangko deficit-ni gadangona ra•doatanio gong kror 700-mangko nangdapgen ine pa•sike dongskaengachim.
Skigiparangni non-cooperation movement (NCM)-ko ong•atanio uamang sorkari aro education department-o nangchakegipa maming kamrangko ka•jawa ineba FASTOM-ni dilgipa parakataha.
