Shillong, Aug 16: Hynniewtrep National Liberation Council (HNLC) bobil dolni gitcham general secretary Cheristerfield Thangkhiew-ko police-rangni so•ote galani gimin manderangni ka•a ding•chao so•sojengjeng ong•angani ja•man Sombar salo, jolni MLA PT Sawkmie, so•sojengjeng ong•anggipa Mawlai-Nongkwar jolrangko niangaha.
Jolo songdongenggipa manderangni u•iatani gitade, CRPF-ni sipairang, ia jolrangona re•ange manderangko chadrapeani ja•man jolo songdongenggipa manderang, CRPF dolni sipairangko chadrapskaahachim. CRPF aro jolo songdongenggipa manderangni gisepo adita dinggrikani ong•angaha aro dolgni dinggrikanio dokkanrang nosto ka•ako man•aha aro garirangba nosto ka•ako man•aha ine kobor on•timgiparang u•iataha.
Ramarango jolni manderang, gantongrangko so•e, botol, ro•ongrangko dane champengtokaha aro Nongkwar-ni Block 9-o donggipa CRPF camp-ko ra•galchina sorkario dabiangtokaha ineba kobor on•aha.
Ia biaprangko nieani ja•man jolni MLA PT Sawkmie-ba, ia biapo donggipa CRPF camp-ko ra•galchina sorkariko didiangaha.
So•sojengjeng ong•anio noksan ong•atako man•gipa manderangna tangka paisarangko gamskachina ua sorkariko didigen ineba Sawkmie aganaha.
“Niamko ma•sigipa manderangsa niamrangko pe•enga aro iani gimin anga CRPF-ni kamko jegalna ska. So•sojengjeng ong•aniko namatani pal uamang (CRPF) manderangko dokaha aro manderangni gam-jinrangko nosto ka•aha. Ia biapo CRPF camp-ko donangkua ong•ode manderang kenchipchipe dongna nanggen, uni gimin ia CRPF camp-ko ta•raken ra•galna nanga,” ine Sawkmie aganaha.
MLA-ni parakatani gitade, Robibar walo dolgni dinggrikanichi sakgittamna baten manderang saknaanirangko man•aha aro uamangko da•o noktangtangon sanenga.
Tom•tomaniko ra•bapilna gita apsan nangrime kamko ka•china gitaba ua Mawlai-o songdongenggipa manderangko aro dingtang dingtang dolrangko didiangaha.
