Baghmara, June 24: Mikkarang waanganichi a•arang rurongdape rama champengatako man•enggipa South Garo Hills a•jani Maheskola aro Mahadeo songrangona Indian Air Force (IAF)-ni helicopter-rango, merong aro uandakgipa manderangni nangchongmotgipa bosturangko sokate on•aha.

South Garo Hills official-rangni u•iatani gitade, ia helicopter-rang, Moheskola simani South West Khasi Hills a•jachipak biloneaha aro ia helicopter-rango ra•anggipa ma•manti bosturangko, songni manderangna suale on•skana gita sorkarini dingtang dingtang dolrang ra•chaksoaha.

Ia bosturangko, sorkarini nirokanio dingtang dingtang volunteer-rang, songni manderangna suale on•anggen.

Ia songrangona helicopter-rango ra•ange on•gipa bosturangara, merong, dal, chini, kari, biscuit, dud, cha•ani to, kombol aro manderangni nangchongmotgipa dingtang dingtang bosturang ong•achim.