Tura, May 12: Budbar salo, South Garo Hills a•jani Chokpot sub-division-ni ning•o donggipa Silkigre joloniko ja•delgimin me•chik saksani sogimin manggisiko man•aha.
Police-rangni u•iatani gitade, ia me•chikni manggisiko Silkigre police outpost-ni ning•o donggipa Tebisokgre songni manderangsa, chiring sambaoniko nikchengaha. Ia me•chikni manggisio ba•ra cholarangba dongjachim aro uni skoba ia manggisio dongjachim ine police-rang u•iataha.
“Ia manggisini bidingo songni manderang chingna u•iataha aro chinga ua biapona re•angani ja•man manggisiko post mortem-na on•ataha. Ia me•chikko drae til•ekani ja•man so•ote galakon chinga chanchichipenga indiba post mortem report sokbaahaosa chinga tale ma•sina man•gen,” ine South Garo Hills a•jani Superintendent of Police Rituraj Ravi parakataha.
Batanggimin antirango mande gimaani report-rangko police-rang man•soa dongjachim aro iani bidingo police-rang am•sandina a•bachengataha ineba SP parakataha.
