Tura, June 22: Batanggimin antirangonin dontonggija mikkarang waanganichi South Garo Hills a•jao nangchakea man•gipa dingtang dingtang biaprangko aro mongsongbate Siju aro Karukol songrangona dakanggipa ramarang champengatako man•na nangahani gimin Meghalaya a•dokni Chief Minister Conrad K Sangma, Mongolbar salonin ia biap aro ramarangko niangaha.
Koborko on•ani gitade, South Garo Hills a•jao, mongsongbate Siju, Karukol aro Rongara jolrango rama jal•langrangsan ong•aigija manderangni rochakgipa dingtang dingtang biaprang, jekai Siju Cave aro uandakgipa biaprangba namen nosto ka•ako man•angaha.
Ia biaprangona dakanggipa ramarang chu•gimik champengatako man•ahani gimin a•dokni Chief Minister, Karukol-oni Siju-ona konta ringo songreange, nosto ong•ata man•gipa biaprangko niangaha aro ja•mano Siju-oni Rongdong-onaba ua ja•achi doange, a•a be•gipa aro chi bangipa biaprangko niangaha.
Mikkarang dontonggija waanganichi nosto ka•ako man•gipa rama jal•langrang aro dingtang dingtang biaprangko sorkari taripile on•na jotton ka•enga indiba mikkarang waanganio rama jal•langrang aro dingtang dingtang biaprang bilongen nosto ka•ako man•ahani gimin ia biaprangko taripilna gita baditaba jarangkode nangaignok ine kobor on•timgiparang u•iataha.
Adita salrangna skang, mikkarang jime waanganichi Bolsalgre Baghmara-o a•a be•dapa man•e sianggipa mande sakgittamni nokdangnaba Budbar salo, a•dokni Chief Minister, sakprako gong lak 4 ka•e tangka paisarangko on•angaha aro unbaksana Sombar walo Masighat-o ramarangko rongtalatengmiting somoio JCB gnang a•kuangchi ga•akange siangggipa mandeni nokdangnaba Chief Minister, tangka paisarangko on•angaha.
Re•anggipa June 17 tariko Garo Hills gimikon mikkarang jimbee waengmiting somoio Baghmara-ni Bolsalgre gittimo nokdang ge•sako a•a be•dapanichi, jikgipa aro segipa baksa uamangni bilsibri ong•gipa bi•saba so•otako man•ahachim.
