Shillong, Jan 17: Assam aro Meghalaya a•dokni simarango meligrikgijanirangko namatna gita maming ja•kurangko de•na skangba Assembly-ni special session-ko ong•atchina ku•pattienggipani bidingo sorkari cholrangko nigen ine Sombar salo, Meghalaya a•dokni Chief Minister Conrad K Sangma, ku•rachakaniko on•angaha.
Iani bidingo kobor ra•timgiparang baksa agangrikengon, a•dok damgnini simarango meligrikgijanirangko namatna ja•ku de•anio sorkari, dingtang dingtang political dolrangni chanchianirangkoba ra•manaha ine Chief Minister parakataha.
Simarango meligrikgijanirangko namatna Assam sorkari baksa agangrikengon, Assembly-oba iani bidingo apsan chanchirimna gita opposition dolrang, sorkariko didiengani gimin Chief Minister, ia kattarangko aganaha.
Chief Minister-ni parakatani gitade, Sombar salo ua dingtangmancha Assam-ni chief minister Himanta Biswa Sarma-ko Guwahati songjinmao grongetaiaha aro a•dok damgnini simarango meligrikgijanirangko uamang re•baenggipa January 21 tariko Meghalaya a•dokni bilsi 50 gapaniko manina skangan namatna jotton ka•engachim.
