Shillong, Oct 22: Meghalaya a•dokni SSA skulrango skigiparangna jabrini dormaharangko on•kujaengani gimin aro uamangni kamko regularise ka•china dabianiko sorkari knachakjaengani gimin Meghalaya SSA School Teachers Association (MSSASTA)-ni ning•o donggipa skigiparang, re•baenggipa November 9 tariko sorkarini kosako jingjengatttaina tik ka•angaha.
Ia jingjengataniko ong•atani bidingo kobor ra•timgiparangna u•iatengon, skigiparangni dabianirangko sorkari knachakna gisik nangjaengani gimin aro jabrini dormaharangko on•kujaengani gimin re•baenggipa November-ni 9 tariko skigiparang jingjengatna tik ka•aha ine MSSASTA-ni president Aristotle Rymbai parakataha.