Shillong, Mar 2: Meghalaya a•dokni SSA skulrango skigiparangna sorkari, re•anggipa October aro November jagnini dormaharangko on•na ku•rachakataha.
Meghalaya SSA Schools Association (MSSASA)-ni president Aristotle C Rymbai-ni parakatani gitade, Budbar salo association-ni dilgiparangko gronge agangrikani somoio iako a•dokni Education Minister Lakhmen Rymbui ku•rachakataha.
SSA skulrango skigiparangna jagnini dormaharangko on•chengna gita Finance department, tangka paisarangko on•na tik ka•ahani gimin sorkari, skigiparangna jagnini dormaharangko on•chengna man•gnok ineba Education Minister, MSSASA-ni dilgiparang parakataha.
December, January aro February jagittamni dormaharangkode India sorkarioniko gnigipa installment-ko man•soahao on•skagen ineba Education Minister, association-ni dilgiparangna ku•rachakaniko on•ataha.
SSA skulrango skigiparangna jabongani dormaharangko on•kujaengani gimin Budbar salo, skigiparang jinma Polo Ground-oni Secretariat-ona re•jomangahachim indiba Raj Bhavan-ona sokon, uamangko police aro magistrate-rang champengsoe uamangoni sakdokkosan Secretariat-ona re•angna on•aiahachim.
Uandaken MSSASA-ni dilgiparangko uamangni president Aristotle Rymbai, Secretariat-ona re•dilange, Education Minister-ko gronge agangrikeaha.
Gipin skigiparangde ua somoio Malki kal•chakramona re•ange, dilgiparangni koborna sengsoskaaha.
