Shillong, July 21: Meghalaya Urban Affairs Minister Pa Sniawbhalang Dhar-ni Shillong-ni jeng-jabolrangko galram biap Marten-ona re·bae nirokea dongjani gimino Seng Samla Mawlai Pyllun (SSMP), Butbar pringo jabol salbagipa trak garirangko champenge napchakram cholgugako tekchenge donangaha.
SSMP, napchakgipako tekchanganiko Butbar pring 8 bajion dakangaha jeon jeng-jabolrangko salbagipa trak garirang Marten-o napna man·jae ka·sinsin riting dakna nangaona sokaha aro adita kontarang ja·manon uko re·pakenggipa gipin garirangba neng·nikanirangko chagrongna gita a·bachengaha.
Napchakgipako tekchange donengani gimino jabol salbagipa trak bolsaba napna man·jana gita SSMP-ni padot Samuel Biam, general secretary Samran Syiem aro organisation-ni manderang ua biapo dongtime champengangtokaha.
Iani bidingo koborna parakatengon, ia ja·kuko de·na gita sorkarian chingko draataha ine organisation-ni jakrikra Samran Syiem aganaha, jean uamang iani bidingo kamko jako ra·enggipa minister Pa Sniawbhalang Dhar-ko grongaha aro ua an·tangba antisani gisepon ia biapona re·bae nirokena gita ku·rachakataha aro chittioba chinga una sal 14 somoirangko on·ahachim, indiba ia salrangni gisepo ua re·baemangba nirokea dongchipja ineba ua agandapataha.
Nanga gita daitoko ra·e sorkarini kamrangko ka·jaengani gimin suk ong·jae, songjinmani jeng-jabolrangko galram biapni mamlako ru·uta bilsirangna kingking matchotna man·jaengani gisepon gital a·ako sandie man·anio sorkari maidake ja·manchana nanga ineba SSMP sing·doanga baksana, ru·uta bilsirangna kingking namgniko on·nagipa cholrangko dake iani bidingo neng·nikanirangko namate on·chinaba uamang sorkario dabiangjolaha.
“Jabolrangko simsake galenggipa biap Marten-o jabolrang gapketahani gimin sorkarini ia biapo jabol galaniko komiate biap gipinko sandie galchakataniko chinga nangnikenga. East Jaintia Hills a·jao adita dam koela cho·gipa a·kolrangba gnangchim, maini gimin ianoni jabolrangko uchina ra·ange galeskana man·ja, iako dakanichi ua jolo donggipa manderangni ong·telaigipa a·selrangko chagronggniko naljokatna man·genchim,” ineba Syiem janapataha.
Unbaksana, sanchakramo jakkale galgimin bosturangko name galna man·na gita Marten-o kragipa technology-ko songe donchina dabiangengon, iarangko dakna gita NEIGRIHMS-o man·engode Meghalaya sorkari maini gimin apsanko ja·rikna man·skajaenga ineba Syiem sing·dongjolaha.
