Shillong, Oct 11: Meghalaya a•doko gitchambatsranggipa St Edmund’s College-ni bilsi 100 gapaniko re•baenggipa November 5 tariko manianggen aro ia manianio seminar, book fair, inter college kal•susaanirang, git ring•anirang aro uandakgipa program-rangko ong•atna tarisamsoengaha ine Mongolbar salo, St Edmund’s College-ni principal Dr Sylvanus Lamare parakataha.

St Edmunds College-ko kulichengaoni da•o ia college-o ge 20 under-graduate department-rang aro ge 1 post graduate department dongaha, jeon sak 2800 chatro chatrirang, sak 110 skigiparang aro gipin kamrangko ka•enggipa sak 40 manderang donga ine u•iataha.

Dr Lamare-ni parakatani gitade, St Edmund’s College-na India sorkarini ning•o donggipa Biotechnology Department, dingtangmancha ‘Star’ gadangko on•aha aro da•o dipet India a•songo ‘Star’ gadangko man•gipa college-rang damgnisan dongkuengpiti aro uan Meghalaya a•dokni St Edmund’s College aro Assam-ni Lakhimpur College ong•enga.