Shillong, Sep 9: Sukrobar salo, East Khasi Hills a•jani District Tuberculosis Office-ni gita St Edmund’s College-ni Social Work department-o poraienggipa chatro chatrirangna Tuberculosis (TB) sabisini bidingo agan-talate on•na gita orientation program-ko Shillong songjinmani Mawprem-o donggipa District TB Hall-o ong•atangaha.
Ia program-ko ong•atanio State TB Officer Dr M Mawrie, mongsonggipa sokgipa ong•e, chatro chatrirangna aganprakengon, maikai chu aro ta•makkurangko jakkalanichi mandena namgijaniko ra•bana man•achim, uarangni bidingo agan-talate on•angaha.
Ia program-ko ong•atanio District TB Officer Dr J Kharwanlang-ba dongpae, chatro chatrirangna aganprakengon, TB sabisini rokomrang aro sabisini chinrangni gimin agan-talate on•angenba, maikai TB sabisiko chel•chakna aro sanna banna gita man•achim, uarangni giminba talate on•angjolaha.
Ia program-ko ong•atanio dingtangmancha TB sabisini bidingo sing•anirangna aganchaksusaani aro dakmesokanikoba nikangna gita man•aha.
