Guwahati, Aug 16: All India Mahila Congress-ni president Sushmita Dev, Robibar salo a•songni jakgitelani salko maniani somoio Congress doloni ong•kataha.
Ua an•tangni kam watani chittiko Congress dolni president Sonia Gandhi-na on•atahaoba, ua maini gimin Congress doloni ong•kataha, uani giminde talataniko on•skajaha.
Congress doloni ong•katani ja•man Sushmita Dev, Congress dolni Whatsapp group-oniba ong•kate an•tangni Twitter bio-o an•tangko Congress dolni gitcham dilgipa ine seskaaha.
Bilsi 30-mangna Congress dolni bak ong•paaniko ua pangnan gisik ra•kamgen ine janapatengon, ua gital dake manderangna dangdike on•skana miksonganirang dongenga ine Sushmita parakataha.
Bilsi 48 ong•gipa Sushmita Dev, Congress-ni chadambe dolko dilanichi an•tangni politics-ni kamko a•bachengahachim aro ua ta•raken politics-ni kamo dal•rorobae, 2009 bilsion Silchar Municipal Corporation-ni Chairperson ong•na man•ahachim. Uni ja•man ua 2011 bilsio Assam Assembly election-o susae chegipa ong•aha.
Indake ong•engon, Congress doloni ong•katani ja•man Sushmita, Trinamool Congress (TMC)-o napskanaba gnang aro ua da•o dipet Kolkata-on ong•enga ine kobor on•timgiparang parakataha.
