Ampati, Nov 30: COVID-19 sajinmani a•sel bilsignimangna chipe donatani ja•man, South West Garo Hills a•jani Kalaichar aro Bangladesh Kurigram a•jani Baliamari simao donggipa Indo-Bangla Border Haat-ko Budbar sal dipet kulipiltaiaha.
Ia Border Haat-ko kulipilani somoio India a•songchipakni South West Garo Hills a•jani Additional Deputy Commissioner AVD Shira baksana district administration aro district police-ni official-rang dongpae bak ra•angaha.
Ia Border Haat-ko 2020 bilsini March jao, COVID-19 sajinmani a•sel chipe donatna gita nangahachim aro ia Border Haat-ko 2021 bilsini January jao kulipiltaiahaoba, gnigipa changna COVID-19 giprorotaiahani gimin chipe donattaina nangahachim.
Koborko on•ani gitade, ia Border Haat-ko antini Sombar aro Budbar salrango salgni dake kulina tik ka•aha aro ia Border Haat-o ming 62 bosturangko bading chiwalgrikna, palbadinggiparangko sak 50-ona bariatna, Border Haat-ko nitodapatna aro bazar cha•chakgipa biapko kadulna gitaba Indo-Bangla Joint Border Haat Management Committee tik ka•e donangaha.
