Tura, Dec 20: 2024 bilsini gisepon India a·songni songadam nokadamrango donggipa nokdang ge·antionan ringani chirangko sokate on·na miksonganio ma·mong sorkarini ra·gatgipa Jal Jeevan Mission-chi South West Garo Hills a·jaoba da·o songni nokni manderang chel·a biaprangoniko ko·e jakkalna nanggija noktangtangon chirangko man·na a·bachengtokengaha.
Ia Jal Jeevan Mission-ni ning·o ma·mong sorkari, 2024 bilsini gisepo songadam nokadamrango donggipa nokdang ge·antionan chi pipe-rangko sale on·na miksongengoba Meghalaya a·dokode ia kamko 2023 bilsini gisepon chu·sokatskana miksongengachim aro uandaken da·o Garo Hills gimikon songni nokni manderangna chi pipe-rangko sale on·na a·bachengahachim.
South West Garo Hills a·jaoba ia kamko PHE-ni official-rang, gisiko nange ka·chakataha aro uandaken ia bilsini gisepo ge 3000-na baten nokdangrangna chi pipe-rangko sokate on·na man·aha ine u·iataha.
Ia 2020-21 bilsina nisan dongimin ge 13,072 nokdangrangoni da·o ge 2425 nokdangrangnade chi pipe-rangko sale on·manaha aro da·o ge 3000-na baten nokdangrangba chi pipe-rangko man·tokengaha ineba official-rang u·iataha.
Koborko on·ani gitade, ia Jal Jeevan Mission-ni ning·o ra·na miksongenggipa songrangoni nokdangrangna agreba, skul, Anganwadi centre, health centre aro community hall-rangnaba chi pipe-rangko sale on·na man·engaha.
—
