Shillong, July 14: Tarabari jolrangko Assam a•doko napdraatenga ine a•dokni dingtang dingtang songbadrango seaniko Rambrai-Jyrngam-ni MDC aro NPYF-ni ku•wattimgipa Bajop Pyngrope jegalatenba, Tarabari jolo songdongenggipa manderangde Meghalaya a•dokni election-rango pu•ongiparang ong•jachim aro Assam a•dokni bakan ong•achim ine talataniko on•angaha.
Ia Tarabari jolba Assam aro Meghalaya a•dokni simarango meligrikna man•jaenggipa biaprangoni damsa ong•achim aro ia jolni bidingo talataniko on•angengon, ia jolrangonaba regional committee, re•ange jolni manderang baksa agangrikeaha aro Tarabari jolo songdongenggipa A•chikrangoni 80 percent-an Meghalaya a•dokona re•bana nangniktokaniko paraktokaha ine Bajop parakatenba, jolo songdongenggipa manderang baksa agangrikani ja•manosa regional committee, Tarabari sector-ni 4.69 sq km-kode Meghalaya a•dokona ra•bana tik ka•aha ine talataniko on•angaha.
A•dok damgnini soi ka•grikgipa MoU-ni gitade Tarabari jolgimikan da•o Meghalaya a•dok ning•on ong•engachim indiba ia jolo songdongenggipa 20 percent-ni gitasa iako jegaltokskaengachim.
Ia wa•rengko gitcham sorkarian salahachim ine janapatengon, da•o a•dok damgnini soi ka•grikgimin MoU-ko jegalaniara, indita bilsirangna meligrikna man•jaenggipa biaprangko gitcham sorkarini namatna sikgijanikosa mesokani ong•enga ine Bajop parakataha.
Re•baenggipa 2023 bilsioba NPP, bilona re•bapile ia MoU-ko chu•sokatgen ineba NPYF-ni dilgipa parakataha.
