Shillong, May 11: Meghalaya sorkarini on•enggipa proposal-ko Harijan Panchayat Committee (HPC) ra•chakna jechakengoba, Shillong songjinmani Them Iew Mawlong-o songdongenggipa dol 342 Harijan nokdangrangko gipin biapona apjitna sorkari tariaha ine Bristibar salo, a•dokni Urban Affairs Minister Sniawbhalang Dhar parakataha.
Harijan nokdang ge•prakna square metre 200 a•arang baksana unit-prako gong lak 20-ko on•china HPC-ni sorkario dabianiara agre rakdugaenga ine janapatengon, iani bidingo a•dok sorkari, Meghalaya High Court-o affidavit-ko ka•aha ine Dhar parakataha.
Urban Affairs Minister-ni parakatani gitade, sorkarini on•enggipa proposal-ko Harijan Panchayat Committee ra•chakna jechakenga ine sorkari, High Court-o affidavit ka•aha.
Indake ong•genchimoba, da•o dipet a•dokni Deputy Chief Minister aro High Level Committee-ni chairman Prestone Tynsong, gipin biapona re•angani gimin sorkari, mikkang antiosa iani bidingo chanchina nangao ga•akenga ine Dhar parakataha.
