Shillong, Aug 5: Sukrobar salo, Jowai-o donggipa Thomas Jones Synod College-ni bilsi 25 gapaniko manina gita tom•aniko ong•atanio ia college-ni gita science block-ko Meghalaya a•dokni Chief Minister Conrad K Sangma, a•dokni Education Minister Lahkmen Rymbui aro Jowai-ni MLA Wailadmiki Shylla-ni dongpaanio nokdonggae on•angaha.
Ia gital building-ko rikna gita India sorkarini Rashtriya Uchchatar Shiksha Abhiyan (RUSA)-ni ning•o tangka paisarangko chame on•ahachim.
Thomas Jones Synod College-ni bilsi 25 gapaniko manianio a•dokni Chief Minister, jinmana aganprakangengon, chadamberangan a•dokni mongsonggipa cholrang gita ong•a aro chadamberangni dal•roroanio namgipa cholrangko on•na gita sorkari, dongtonggija kamrangko ka•enga ine parakangaha.
Chadamberangni bilko namao jakkalna gita namgipa cholrangko bikote on•aniara songsal aro sorkarini daitoan ong•a ineba ua aganaha.
A•dokni chadamberangara atchikapaonin changgipa sapgiparang ong•a ine janapatengon, chadamberangko uamangni changa sapanio namdapatna gita sorkari, batanggimin bilsibrini gisepo chadamberangna bang•en program-rangko tarie on•aha ine Chief Minister parakataha.
Jowai-o Mini Secretariat-ko rikna aro jillako nitobatatna gita sorkari, tangka paisarangko chame on•aha ineba ia tom•anio Chief Minister parakataha.
