New Delhi, Nov 3: Italy aro Glasgow songjinmaoni sokbapila bakan a•songni Prime Minister Narendra Modi, COVID-19-ni tikarangko su•anio komibatenggipa dingtang dingtang a•jarang baksa video conference gita agangrikangaha.
Jharkhand, Manipur, Nagaland, Arunachal Pradesh, Maharashtra, Meghalaya aro dingtang dingtang a•dokrang, jeon COVID-ni tikarangko su•ani komienggipa a•jarang dongachim, uandakgipa a•jarang baksa a•songni Prime Minister agangrikangaha.
Internet gita a•songni Prime Minister Narendra Modi baksa agangrikangani somoio dingtang dingtang a•jani district magistrate-rang, a•jatangtango tikarangko su•na kam ka•anio man•enggipa neng•nikanirangko aro maini a•sel tika su•anirang komiengachim, uarangni gimin talataniko on•angtokaha.
Indake ong•engon, maiko dakode dingtang dingtang a•jarango COVID-ni tikarangko chu•gimik matchote su•na man•gen, uarangni bidingo a•songni Prime Minister, dingtang dingtang a•jarangna agan-ku•pattianirangko on•angskaaha. Tikarangko su•na kam ka•anio toromni dilgiparang aro joltangtango dilgiparangni dakchakanirangko ra•china gitaba ua didiangaha. Ia bilsini bon•angao tika su•anirangko bariate ka•dongani gnang gital bilsiko nisochina gitaba ua dingtang dingtang district magistrate-rangko didiangaha.
Dingtang dingtang a•dokni chief minister-rangko mittelpilangengon, uamangni gisik on•e kam ka•anian dingtang dingtang a•jarangko gisiko nangbate kam ka•china didiani ong•gen ine Prime Minister Modi aganaha.
COVID-19 tikani bidingo manderangni ma•sisretanirangko janapangengon, ia tikani bidingo manderangna talate on•anichisan ia ma•sisretanirangko chel•atna man•aigen ine ia kamo toromko dilenggipa manderangni dakchakanirangko ra•china ua a•dokni official-rangko didiangaha.
Tika su•aniko bariatna man•na gita nokantionan re•e tikarangko su•china gitaba PM Modi didiangaha.
