Ahmedabad, Dec 30: Dingtangmancha kamna manderangni on·gile chimonggimin tangka-paisarangko jakkalsretanina, Trinamool Congress (TMC)ni ku·wattimgipa Pa Saket Gokhale-ko Gujarat Police, mija Bristibar attamo Delhi-oniko rim·aha.
Pa Gokhale-ko Ahmedabad Cyber Crime Branch-ni manderang Bristibar salo rim·enba uni kosako niam gita ja·kurangko de·atna gita Ahmedabad-ona rim·e ra·baaha, ine saksa a·gipi police official u·iataha.
Gokhale-ko jasani gisepon Gujarat police, gittamgipa changna rim·taiaha. Skanggipao uko mija December 6 tariko, Morbi jillaona dollong be·gruani ja·man a·songni Prime Minister Pa Narendra Modi-ni wenangani somoio koros ong·ani bidingo tol·gipa koborrangko gipruraatanina matnange Cyber Crime Branch-ni manderang rim·ahachim. Uanoni jamin man·ani ru·utgijan, apsan mamlaon Morbi police, TMC-ni dilgipako December 8 tarikon rim·piltiaha aro ua uni ja·manba jamin man·e dongengachim.
