Shillong, July 18: Meghalaya a·doko tourism-ni kamrangko a·bachengpiltaina gita sorkari cholrangko niengaha ine adita salrangna a·dokni Chief Minister Conrad K Sangma parakatahani gimin da·o maming janggi tangani cholrang dongjae, neng·nikanirangko chagrongna nangtokenggipa Dawki Umngot chiringni kewalirangna ka·dongataniko ra·baani gita ong·aha.
Ia sal somoirango COVID-19-ni giproroaniko warachakna gita lockdown-rangko ra·gatanichi aro dingtang dingtang kamrangko dontongatchengani a·sel, Dawki Umngot chibimao ringko choe cha·enggipa manderang, ia biapona rona ba nina re·anggipa manderangko choe cha·ana agrede maming gipin janggi tangani cholrang dongjae neng·nikanirangko chagrongna nangtokengachim ine nikna man·a.
Ia Umngot chiringo ring choe cha·enggipa manderangni aganani gitade, ia sal somoirango tourism-ni kamrangkoba sorkari chipatahani a·sel gipin biaprangoni rona re·baenggipa manderang dongjanichi, uamang maming janggi tangani cholrang dongjae janggi tanganio neng·nikanirangko chagrongna nangtokengahachim.
Ia biapo ringrangko choe cha·enggipa manderang, mitamrangde tangkarangko ra·sroesa an·tangtangni ringrangko tariahani gimin da·o tangka paisarangko gampilna man·jaeba neng·nikanirangko man·tokna nangengaha ineba kewalirang parakataha.
Indake ong·engon, da·o Meghalaya a·doko tourism-ni kamrangko a·bachengatpiltaina sorkari cholrangko niengahani gimin kewalirang, nambata salrangko nikna ka·dongsotokengaha ine parakattokaha.
Ia biapo ring choe cha·enggipa manderangoni 70 percent-de COVID-ni tikarangko su·mangimin manderangsa ong·a aro a·doko tourism-ni kamrangko a·bachengpiltaigenchimoba, gipin biaprangoni a·dokona re·baenggipa manderangko name porikka ra·chengesa re·bana on·na nanga ine kewalirang aganaha.
Ia Umngot chibimara India a·songo rongtalbatsranggipa chibima ine mingako man·gipa chibima ong·achim aro ian East Jaintia Hills a·jani Dawki gita jokgipa chibima ong·achim.
Gipin biaprangoni re·baenggipa manderang Meghalaya a·dokona re·baon pangnan Umngot chibimakoba nina re·ronga aro uandaken ia jolo songdongenggipa bang·a manderangan ia chibimao ringrangko choe cha·skaengachim.
