Tripura, Feb 7: Sorkariko rikenggipa BJP doloni MLA sakgni Pa Sudip Roy Barman aro Pa Ashis Kumar Saha BJP doloni ong⋅katani chittiko aseembly-ni aganchalaitimgipa Pa Ratan Chakraborty-ni jako on⋅aha aro un baksa a⋅dok BJP dolni Padot Manik Saha-naba on⋅jolaha.

BJP ko re⋅dilenggipa Tripura ni skotong Minister ko matnang⋅e Ashsih Das BJP-oni ong⋅kataha. Uamang sakgnian an⋅tangtangni dol-oni ong⋅katani chitti ko Tripura Assembly ni aganchalaitimgipa Ratan Chakraborty na on⋅manaha aro BJP ni State President Manik Saha-naba uamangni BJP doloni ong⋅kataniko ra⋅chakchinaba watataha.

Chinga da⋅al Delhi-chi re⋅ange sokbapiljoko chingni politics-na ja⋅ku ga⋅mikkangengani bidingode rongtale aganaignok ine Roy Barman kobor ra⋅timgiparangna mijalo aganaha.

Kobor man⋅ani gitade, uamang Delhio Rahul Gandhi aro gipin Congress-ni Dilgiparangko grongaha aro congress dolon napgenkon ine chanchichipsoenga.