Agartala, Feb 16: Bristibar salo, Tripura a•dokni Assembly election-ko ong•atangaha aro ia election-o Tripura a•dok gimiko donggipa lak 28.13 voter-rangoni 81%-mangni gita pu•onanio bakko ra•tokaha ine Tripura a•dokni Chief Electoral Officer (CEO) Gitte Kirankumar Dinakarrao parakataha.
Pu•onaniko Bristibar pring 7:00 bajioni a•bachengate attamni 4:00 bajio matchotataha aro ia election-ko ong•atanio adita so•sojengjeng ong•anirangkoba nikna gita man•aha.
Koborko on•ani gitade, badiaba badiaba biaprango so•sojengjeng ong•anganichi CPI(M)-ni dilgipa aro gipin dolrangni polling agent sakgniko man•chape gimik sakgittam manderang saknaanirangko man•na nangaha.
Pu•onaniko a•bachengataonin dingtang dingtang polling station-rango bang•bea manderangni pu•onna gita riting dake senganirangko nikna man•aha aro pilak polling station-rangon chel•chakgipa sipai dolrangko donataha ine CEO parakataha.
Attamni 3:00 bajiona kingking pu•onani 69.96 percent ong•kuengpitichim indiba attamni 4:00 bajio pu•onaniko dontongatani somoi ong•ahaon, Tripura a•dok gimiko pu•onani 81% percent-mang gapangaha ine Tripura-ni CEO parakataha.
Badiaba badiaba biaprango bang•gija so•sojengjeng ong•ana agrede ia election-ko ong•atanio maming dal•a a•sel ong•anirang dongjaha ineba Dinakarrao aganaha.
Ia bilsini Tripura Assembly election-o gimik sak 259 candidate-rang susaengachim aro ia sak 259 candidate-rangoni sak 28-de Trinamool Congress (TMC), sak 55-de Bharatiya Janata Party (BJP), sak 13-de Congress, sak 6-de IPFT, sak 42-de Tipra Motha, sak 43-de CPI(M), CPI, CPI(M)L, AIFB, TSP aro RSP dolrangni sakprak, sak 7-de recognize ong•gijagipa dolrangni aro sak 58 candidate-rangde Independent dolrangoni ong•achim.
Tripura Assembly election-ni result-koba re•baenggipa March jani 2 tariko, Meghalaya aro Nagaland a•dokrangni election result-rang baksa apsan parakna siengachim.
