Agartala, Dec 28: Tripura a·doko ong·nasienggipa Assembly election-na mikkang-mikkang, a·doko sasonni bilko jako ra·enggipa BJP doloni saksa MLA Pa Diba Chandra Hrangkhawl-ni kam watanichi dolna bilgridapani ong·taiaha.

Re·anggipa 2018 bilsio Tripura a·doko assembly election ong·na skang Congress-oni BJP dolo napanggipa Pa Hrangkhawl, an·tangni gita neng·nikanirangko janapenba kam watani chittiko Butbar salo on·eaha.

Indake ong·engon, Pa Hrangkhawl, kamtangko watani chittiko Assembly-ni agan-chalaitimgipa Ratan Chakraborty biaptango dongjani gimino Assembly-ni secretary BP Karmakar-ni jakosa on·eskaaha.

Pa Diba Chandra Hrangkhawl-ni kam watanichi BJP dolo da·o sak 33 MLA-rang dongkuenga, uandake, CPIM-o sak 15, Congress-o saksa aro IPFT-o sakgittam MLA-rang dongenga.