Tripura, Jan 12: Sakbri manderang, jerangko English ku⋅sikchi Transgender in⋅e agana ba jemangan me⋅asa ong⋅e atchigenchimoba me⋅chikni gisik aro cholon-bewal dong⋅a aro me⋅chik ong⋅e atchigenchimoba me⋅asa ni gisk aro cholon bewalrang dong⋅a, uamangko Tripurani Agartalao adita kobor ra•timgipa manderang baksa policerang kragija kal•akaha.Sombar salo Tripurani press conference-o aganengon, policerang uamangni be•eni bakrangko kragija rim•tap-dangtap dake kal•ake roaha, aro police stationaba drae rimange jinmani mikkango ba•ra kancharangko kike niaha. Kobor ra•timgipa manderang aro policerang uamangko, me•asarangsa an•tangni bimangko dakjee, baro tol•mike kam ka•enga ine ong•gija chanchichipe dakani a•selsa ia obostarang ong•aha ine kal•akako man•giparangoni aganaha. A•sel ong•ao ga•akgipa Mandeni parakani gitade, police stationomangba uamangko ku•atogija kattarangchi saiaha aro sin•bemiting somaio ba•ra kancha gri walgimik police station-o dongataha aro ma•a-paa, ripengskarangnamangba phone ka•na on•jaha. Kakket bichalko on•china LGBT dolrang mokordoma ka•angaha.