Tura, May 30: West Garo Hills a·jani Dakopgre-o donggipa Petrol Pump -ni mikkangchakgipao Mongolbar pringo wa·al kamanichi te·gittam dokan nokrangko tapra changpile bon·e-chon·en kamaha ine koborna parakataha.
A·sel ong·gipa biapara CRPF camp sambao ong·a, aro pring 8 bajimango wa·al kamchakatanichi ua biaponi cha dokan, tyre dokan aro kni ratgipa dokan nokrangko chu·gimik kamaha.
Pringchibara skulni somoiosa ia obosta ong·ani gimin ramao garirangni sket-changket ong·anikoba ua somoio nikna gita man·angaha. Indake ong·engon, Fire and Emergency Services department-ni manderang koborko man·a tapan obosta ong·gipa biapona sokbagalgale wa·alko rukimite galenba gipin biaprangchina kamroroanggniko aro noksan ong·dapgniko champengna gita man·srapaha.
A·sel ong·aniko biapo donge sandirokataniko dakani ja·man gas cylinder bretani a·selsa wa·al kamna gita a·bachengaha ine officialrang talataniko on·angaha. Unbaksana, dokanrangko wa·al kamanichi gong lak 4 oni lak 5-rangni gitade noksan ong·aignok ineba bil man·giparang chanchichipe parakataha.
Rasong gnangbee ia a·selo manderangde maming saknaa ba mata-bu·arangko chagronggipa dongjaha aro ia obosta ong·ani ja·pangko police-rang che·em sandirokataniko dakenga ineba koborna parakataha.
