Tura, Jan 13: Meghalaya a•dokni bilsi 50 gapaniko manina gita tarisamsoanio Tura jillani ning•o donggipa dingtang dingtang gittimrangko rongtalatan baksana nitoatanirangko daktokengani gimin Bristibar salo, a•dokni Chief Minister Conrad K Sangma, dingtang dingtang gittimrangona re•ange ia biaprangko niangaha.
Tura jillani ning•o donggipa Nikwatgre, Beldarpara aro Fancy Valley gittimrangona a•dokni Chief Minister re•angaha aro unbaksana West Garo Hills a•jani Deputy Commissioner Ram Singh, Tura Municipal Board (TMB)-ni CEO Rikse Marak aro dingtang dingtang department-ni officer-rangba dongpaaha.
Ia biaprangko nieani somoio a•dokni Chief Minister, gittimni manderang baksa agangrikengon, an•tangtangan an•tangtangni gittimrangko nirok sandichina Meghalaya Day-ko maniani ja•manoba gittimtangtangko rongtal an•tale rakkiangkuchina gita didiangaha. Gittimo songdongenggipa sakantian bakko ra•anichi an•tangtangni town jillarangko rongtale rakkina man•gen ineba ua aganaha.
